Friday 22 June 2012

ಆಂಡ್ರಾಯ್ಡ ವೈರಸ್‌ಗಳು!

 ಪ್ರಜಾವಾಣಿ ವಾರ್ತೆ
ಕಳೆದ ಎರಡು ವರ್ಷಗಳಲ್ಲಿ ಮೊಬೈಲ್ ಕಂಪ್ಯೂಟಿಂಗ್ ಬಳಕೆ ದ್ವಿಗುಣಗೊಂಡಿದೆ. ಅದರಲ್ಲೂ ಗೂಗಲ್ ಆಂಡ್ರಾಯ್ಡ ಸ್ಮಾರ್ಟ್‌ಫೋನ್‌ಗಳು ಮಾರುಕಟ್ಟೆಗೆ ದಾಂಗುಡಿಯಿಟ್ಟ ನಂತರ ಮೊಬೈಲ್ ಅಂತರ್ಜಾಲ ಬಳಕೆ ವಿಧಾನವೇ ಬದಲಾಗಿ ಹೋಗಿದೆ ಎನ್ನುತ್ತದೆ ಮೊಬೈಲ್ ಮಾರುಕಟ್ಟೆ ಸಂಶೋಧನಾ ಸಂಸ್ಥೆ `ಗಾರ್ಟ್‌ನರ್` ನಡೆಸಿದ ಸಮೀಕ್ಷೆ.

ಮೊಬೈಲ್ ಮೂಲಕ ಅಂತರ್ಜಾಲ ಸಂಪರ್ಕ ಪಡೆದುಕೊಳ್ಳುವ ಗ್ರಾಹಕ ತನಗೆ ಅರಿವಿಲ್ಲದಂತೆ ಹಲವು `ಮಾಲ್‌ವೇರ್`ಗಳನ್ನು ತನ್ನ ಹ್ಯಾಂಡ್‌ಸೆಟ್‌ನೊಳಗೆ ಬರಮಾಡಿಕೊಳ್ಳುತ್ತಾನೆ. ಸಾಮಾನ್ಯ ಮೊಬೈಲ್ ಬ್ರೌಸರ್‌ಗಳಿಗೆ ಈ ವೈರಸ್‌ಗಳನ್ನು ತಡೆಯುವ ಸಾಮರ್ಥ್ಯ ಇಲ್ಲದಿರುವುದರಿಂದ ಇವು ಸುಲಭವಾಗಿ ಒಳನುಸುಳಿ ದತ್ತಾಂಶಗಳನ್ನು ಹಾಳುಮಾಡುತ್ತವೆ.

ಉಳಿದ ಮೊಬೈಲ್ ಆಪರೇಟಿಂಗ್ ಸಿಸ್ಟೆಂಗಳಿಗೆ ಹೋಲಿಸಿದರೆ ಆಂಡ್ರಾಯ್ಡ ಕಾರ್ಯನಿರ್ವಹಣಾ ತಂತ್ರಾಂಶ ಇರುವ ಸ್ಮಾರ್ಟ್‌ಪೋನ್‌ಗಲ್ಲಿ ವೈರಸ್ ಭೀತಿ ಹೆಚ್ಚು ಎನ್ನುತ್ತದೆ ಕ್ಯಾಸ್ಪ್ರಸ್ಕಿ ಲ್ಯಾಬ್‌ನ ಸಂಶೋಧನೆ.

`ಆಂಡ್ರಾಯ್ಡನಲ್ಲಿ ಮಾಲ್‌ವೇರ್ ಹರಡುವಿಕೆಯು ಕಳೆದ ಎರಡು ವರ್ಷಗಳಲ್ಲಿ       ಶೇ 400ರಷ್ಟು ಹೆಚ್ಚಿದೆ` ಎನ್ನುತ್ತದೆ ಇತ್ತೀಚೆಗೆ ಬಿಡುಗಡೆಗೊಂಡ ಜುನಿಫರ್ ನೆಟ್‌ವರ್ಕ್‌ನ `ಗ್ಲೋಬಲ್ ಮೊಬೈಲ್ ಥ್ರೆಟ್` ವರದಿ.  2010ರ ಜನವರಿಯಲ್ಲಿ ಆಂಡ್ರಾಯ್ಡ ಮಾರುಕಟ್ಟೆಯಲ್ಲಿ ಮೊದಲ ಬ್ಯಾಂಕಿಂಗ್ ಫಿಶಿಂಗ್ ಅಪ್ಲಿಕೇಷನ್ ಕಾಣಿಸಿಕೊಂಡಿತ್ತು. ಇದನ್ನು `ಡ್ರಾಯ್ಡ 09` ಎಂದು ಗುರುತಿಸಲಾಗಿತ್ತು.

ಆನ್‌ಲೈನ್ ಬ್ಯಾಂಕಿಂಗ್ ಮಾಹಿತಿ ಕದಿಯಲು ಈ ವೈರಸ್ ಅಭಿವೃದ್ಧಿಪಡಿಸಲಾಗಿತ್ತು. ಅದೇ ವರ್ಷ ಮಾರ್ಚ್‌ನಲ್ಲಿ ಮೊದಲ ಆಂಡ್ರಾಯ್ಡ `ಬೂಟ್‌ನೆಟ್` ವೈರಸ್‌ಕಾಣಿಸಿಕೊಂಡಿತು. ಮತ್ತೊಂದು ಅಪಾಯಕಾರಿ ಸ್ಪೈವೇರ್ `ಟಾಪ್ ಸ್ನೇಕ್` ವರದಿಯಾಗಿದ್ದು ಜುಲೈನಲ್ಲಿ. ಗೇಮಿಂಗ್ ತಂತ್ರಾಂಶವೊಂದರ  ಮೂಲಕ ಹ್ಯಾಂಡ್‌ಸೆಟ್ ಪ್ರವೇಶಿಸುವ ಈ ಕುತಂತ್ರಾಂಶ ನಂತರ ಇಡೀ `ಜಿಪಿಎಸ್` ವ್ಯವಸ್ಥೆಯನ್ನು ಹಾಳುಗೆಡವುತ್ತಿತ್ತು. `ಜಿಪಿಎಸ್` ಗೂಢಾಚರಣೆಗೆ ಈ ಸ್ಪೈವೇರ್ ಅಭಿವೃದ್ಧಿಪಡಿಸಲಾಗಿತ್ತು ಎನ್ನುವ ವರದಿಗಳಿವೆ. 

`ಫೇಕ್ ಪ್ಲೆಯರ್ 13: ಆಂಡ್ರಾಯ್ಡ ಹ್ಯಾಂಡ್‌ಸೆಟ್‌ಗಳಲ್ಲಿ ಪತ್ತೆಯಾದ ಮೊದಲ `ಎಸ್‌ಎಂಎಸ್` ಟ್ರೋಜನ್ ಇದು. ರಷ್ಯಾದ ಮೊಬೈಲ್ ಬಳಕೆದಾರರು ಇದರಿಂದ ಸಾಕಷ್ಟು ಹಾನಿ ಅನುಭವಿಸಿದರು. ಈ ವೈರಸ್ ತಾನೇ ಸ್ವಯಂಚಾಲಿತವಾಗಿ ಅನಾಮಿಕ ಸಂಖ್ಯೆಗಳಿಗೆ `ಎಸ್‌ಎಂಎಸ್` ಕಳುಹಿಸುತ್ತಿತ್ತು.

ಪ್ರತಿ ಎಸ್‌ಎಂಎಸ್‌ಗೆ ಬಳಕೆದಾರರ 6 ಡಾಲರ್(ಅಂದಾಜು ರೂ. 330) ಕಡಿತವಾಗುತ್ತಿತ್ತು. ಅಸಲಿಗೆ  ಈ ಅಪ್ಲಿಕೇಷನ್   ಆಂಡ್ರಾಯ್ಡ ಮಾರುಕಟ್ಟೆಗೆ ಬಿಡುಗಡೆಯಾಗಿಯೇ ಇರಲಿಲ್ಲ.  ನವೆಂಬರ್‌ನಲ್ಲಿ ಆಂಡ್ರಾಯ್ಡನ `ಆ್ಯಂಗ್ರಿ ಬರ್ಡ್` ಗೇಮ್ ಅಪ್ಲಿಕೇಷನ್ ಮಾರುಕಟ್ಟೆಗೆ ಬಂದಾಗ, ಅದರ ಹೆಚ್ಚುವರಿ ತಂತ್ರಾಂಶಗಳ ಜತೆ `ಫೇಕ್ ಪ್ಲೇಯರ್` ಕೂಡ ಬಳಕೆದಾರನ ಗಮನಕ್ಕೆ ಬರದಂತೆ ಡೌನ್‌ಲೋಡ್ ಆಗಿ ಮೊಬೈಲ್ ಸೇರಿಕೊಳ್ಳುತ್ತಿತ್ತು.

`ಎಂಎಸ್‌ಒ` ಟ್ರೋಜನ್ ಎಸ್: ಮೊಬೈಲ್ ಮೂಲಕ ನಡೆಯುವ ಹಣಕಾಸು ವಹಿವಾಟು ಮಾಹಿತಿಯನ್ನು ಕದಿಯಲು ಅಭಿವೃದ್ಧಿಪಡಿಸಿದ ವೈರಸ್ ಇದು. ನೆಟ್‌ಕ್ವಿನ್ ಮೊಬೈಲ್ ಸೆಕ್ಯುರಿಟಿ ಸೆಂಟರ್ ಕಳೆದ ವರ್ಷದ ಜೂನ್‌ನಲ್ಲಿ ಈ ವೈರಸ್ ಪತ್ತೆ ಹಚ್ಚಿದೆ. ಒಮ್ಮೆ ಹ್ಯಾಂಡ್‌ಸೆಟ್ ಪ್ರವೇಶಿಸಿದರೆ, ಅನಾಮಿಕ ಸಂಖ್ಯೆಗಳಿಗೆ ಎಸ್‌ಎಂಎಸ್ ಕಳುಹಿಸುವ ಮೂಲಕ ಹಾನಿ ಉಂಟು ಮಾಡುತ್ತದೆ. `ಬಿಟ್ ಇನ್ಫೋ ಸ್ಟೀಲರ್` ಎನ್ನುವುದು ಮೆಮೊರಿ ಕಾರ್ಡ್‌ಗಳ ಮೂಲಕ ಹರಡುವ ಮತ್ತೊಂದು ವೈರಸ್.

  `ಮೈ ಅವರ್ ನೆಟ್, ಡ್ರೀಮ್,  `ಜಿಮಿನಿ` ಇವು ಇತ್ತೀಚೆಗೆ ಪತ್ತೆಯಾಗಿರುವ ಮತ್ತಿತರ ಆಂಡ್ರಾಯ್ಡ ಮೊಬೈಲ್ ವೈರಸ್‌ಗಳು. ಈ ವೈರಸ್‌ಗಳು ಬ್ಯಾಟರಿ ಶಕ್ತಿ ಬೇಗನೆ ಕಡಿಮೆಯಾಗುವಂತೆ ಮಾಡಿ, ಹ್ಯಾಂಡ್‌ಸೆಟ್‌ನಲ್ಲಿರುವ ದತ್ತಾಂಶಗಳನ್ನು ಅಳಿಸಿ ಹಾಕುತ್ತವೆ.  ಮೊಬೈಲ್ ವೈರಸ್ ದಾಳಿಯಿಂದ ರಕ್ಷಣೆ ಒದಗಿಸಲು ಬುಲ್‌ಗಾರ್ಡ್ ಮೊಬೈಲ್ ಸೆಕ್ಯುರಿಟಿ, ಕ್ಯಾಸ್ಪ್ರಸ್ಕಿ ಮೊಬೈಲ್ ಸೆಕ್ಯುರಿಟಿ ಮತ್ತು `ಇಎಸ್‌ಇಟಿ` ಆ್ಯಂಟಿ ವೈರಸ್ ತಂತ್ರಾಂಶಗಳು ಮಾರುಕಟ್ಟೆಯಲ್ಲಿ ಲಭ್ಯವಿವೆ

Monday 11 June 2012

ಕ್ಯೂಆರ್ ಕೋಡ್ (QR Code)

qrcode


ಇದೀಗ ನೀವು ನಿಮ್ಮದೇ ಆದ ಕ್ಯೂಆರ್ ಕೋಡ್ ಹೊಂದಲು http://qrcode.kaywa.com/ ಜಾಲತಾಣದ ಮುಖಾಂತರ ನಿಮ್ಮ ಅಂತರಜಾಲ ತಾಣ, ಬ್ಲಾಗ್, ಮಾಹಿತಿ, ಮೊಬೈಲ್ ಸಂಖ್ಯೆ, ಎಸ್ ಎಂ ಎಸ್ ಗಳನ್ನು ಕ್ಯೂ ಆರ್ ಕೋಡ್ ಗೆ ಪರಿವರ್ತಿಸಿ ಅದನ್ನು ನಿಮ್ಮ ಅಂತರಜಾಲ ತಾಣಗಳಲ್ಲಿ ಪ್ರಕಟಿಸಿ, ಮಿಂಚೆ ಮುಖಾಂತರ ನಿಮ್ಮ ಸ್ನೇಹಿತರಿಗೆ ಹಂಚಿ ಅಥವಾ ನಿಮ್ಮ ವಿಳಾಸ ಚೀಟಿ (ವಿಸಿಟಿಂಗ್ ಕಾರ್ಡ್)ಗಳಲ್ಲಿ ಮುದ್ರಿಸಿ ಹಂಚಬಹುದು. ಇದು ಸಂಪೂರ್ಣ ಉಚಿತ ಹಾಗೂ ನಿಮ್ಮ ಸ್ಮಾರ್ಟ್ ಪೋನ್ ಗಳಲ್ಲಿಯೂ ಸ್ಕ್ಯಾನ್ ಮಾಡುವ ತಂತ್ರಾಂಶವನ್ನು  ಉಚಿತವಾಗಿ ಒದಗಿಸುತ್ತದೆ. ನೀವೂ ಒಮ್ಮೆ ಪ್ರಯತ್ನಿಸಿ ನೋಡಬಹುದಲ್ಲವೇ?...



ಈಚೆಗೆ ಅನೇಕ ಜಾಹೀರಾತುಗಳಲ್ಲಿ, ಜಾಲತಾಣಗಳಲ್ಲಿ ಚಿತ್ರವಿಚಿತ್ರ ವಿನ್ಯಾಸದ ಕಪ್ಪನೆಯ ಚೌಕಗಳು ಕಾಣಿಸಿಕೊಳ್ಳುತ್ತಿರುವುದನ್ನು ನೀವು ಗಮನಿಸಿರಬಹುದು; ಇಂತಹ ಚೌಕಗಳ ಪಕ್ಕದಲ್ಲೇ ಪ್ರಕಟವಾಗುವ "ಈ ಕ್ಯೂಆರ್ ಸಂಕೇತವನ್ನು ಸ್ಕ್ಯಾನ್ ಮಾಡಿ" ಎಂಬ ಸಂದೇಶವನ್ನೂ ನೋಡಿರಬಹುದು. ಇದೆಂತಹ ಸಂಕೇತ? ಇದನ್ನು ಸ್ಕ್ಯಾನ್ ಮಾಡುವುದು ಹೇಗೆ? ಸ್ಕ್ಯಾನ್ ಮಾಡಿದಾಗ ಏನಾಗುತ್ತದೆ? - ಇಂತಹ ಅನೇಕ ಪ್ರಶ್ನೆಗಳೂ ನಿಮ್ಮ ಮನಸ್ಸಿಗೆ ಬಂದಿರಬಹುದು.
ಇದು ಕ್ಯೂಆರ್ ಕೋಡ್
ಕ್ಯೂಆರ್ ಕೋಡ್ ಎನ್ನುವುದು ಕ್ವಿಕ್ ರೆಸ್ಪಾನ್ಸ್ ಕೋಡ್ ಎಂಬ ಹೆಸರಿನ ಹ್ರಸ್ವರೂಪ. ಅಂಗಡಿಯಲ್ಲಿರುವ ಪದಾರ್ಥಗಳ ಮೇಲೆ ನಾವೆಲ್ಲ ಬಾರ್‌ಕೋಡ್‌ಗಳನ್ನು ನೋಡುತ್ತೇವಲ್ಲ, ಕ್ಯೂಆರ್ ಕೋಡ್ ಅದರದೇ ಬೇರೆಯದೊಂದು ರೂಪ. ಒಂದೇ ಆಯಾಮದ ಸಾಮಾನ್ಯ ಬಾರ್‌ಕೋಡ್‌ಗಳಿಗಿಂತ ಕೊಂಚ ಭಿನ್ನವಾಗಿರುವ ಇವು ಎರಡು ಆಯಾಮದ ಸಂಕೇತಗಳು ಎನ್ನುವುದೇ ವಿಶೇಷ. ಸಾಮಾನ್ಯ ಬಾರ್‌ಕೋಡ್‌ಗಳಿಗಿಂತ ಹೆಚ್ಚಿನ ಪ್ರಮಾಣದ ಮಾಹಿತಿ ಸಂಗ್ರಹಿಸುವ ಸಾಮರ್ಥ್ಯ ಹೊಂದಿರುವುದು ಕ್ಯೂಆರ್ ಕೋಡ್‌ಗಳ ಮತ್ತೊಂದು ವೈಶಿಷ್ಟ್ಯ.


ಕ್ಯೂಆರ್ ಕೋಡ್‌ಗಳಲ್ಲಿರುವ ಪುಟ್ಟಪುಟ್ಟ ಚೌಕಗಳು ನಿರ್ದಿಷ್ಟ ಮಾಹಿತಿಯನ್ನು ಪ್ರತಿನಿಧಿಸಬಲ್ಲವು. ಅಂಗಡಿಯಲ್ಲಿಟ್ಟ ವಸ್ತುಗಳ ವಿವರಣಾ ಚೀಟಿಯಿಂದ ಪ್ರಾರಂಭಿಸಿ ಜಾಹೀರಾತುಗಳವರೆಗೆ ಕ್ಯೂಆರ್ ಕೋಡ್‌ಗಳನ್ನು ಅನೇಕ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ. ಅನೇಕ ಸಂದರ್ಭಗಳಲ್ಲಿ ಇವು ಜಾಲತಾಣಗಳ ವಿಳಾಸವನ್ನು ಸೂಚಿಸಲು ಬಳಕೆಯಾಗುತ್ತವೆ.


ಇತಿಹಾಸ
ಕ್ಯೂಆರ್ ಕೋಡ್‌ಗಳು ಮೊದಲ ಬಾರಿ ಬಳಕೆಯಾದದ್ದು ಆಟೊಮೊಬೈಲ್ ಕ್ಷೇತ್ರದಲ್ಲಿ. ಕಾರ್ಖಾನೆಯೊಳಗೆ ಬಿಡಿಭಾಗಗಳ ಸಾಗಾಣಿಕೆಯ ಮೇಲೆ ನಿಗಾ ಇಡಲು ಟೊಯೋಟಾದ ಅಂಗಸಂಸ್ಥೆಯಾದ ಡೆನ್ಸೋ ವೇವ್ ೧೯೯೪ರಲ್ಲಿ ಈ ಸಂಕೇತವನ್ನು ಸೃಷ್ಟಿಸಿತು. ಸ್ಕ್ಯಾನ್ ಮಾಡಿದಾಗ ಹೆಚ್ಚಿನ ಪ್ರಮಾಣದ ಮಾಹಿತಿಯನ್ನು ಆದಷ್ಟೂ ಕಡಿಮೆ ಸಮಯದಲ್ಲಿ ಓದುವುದು ಸಾಧ್ಯವಾಗಬೇಕು ಎನ್ನುವುದು ಈ ಸಂಕೇತದ ಸೃಷ್ಟಿಯ ಹಿಂದಿದ್ದ ಉದ್ದೇಶ. ಬಹಳ ಬೇಗ ಜನಪ್ರಿಯವಾದ ಕ್ಯೂಆರ್ ಕೋಡ್ ಆಟೊಮೊಬೈಲ್ ಮಾತ್ರವಲ್ಲದೆ ಅನೇಕ ಇತರ ಕ್ಷೇತ್ರಗಳಲ್ಲೂ ಬಳಕೆಯಾಗುತ್ತಿದೆ.


ಓದುವ ರೀತಿ
ಕ್ಯೂಆರ್ ಕೋಡ್‌ಗಳಲ್ಲಿ ಅಡಕವಾಗಿರುವ ಮಾಹಿತಿಯನ್ನು ಓದಲು ಮೊದಲಿಗೆ ಕ್ಯೂಆರ್ ಕೋಡ್ ರೀಡರ್ ಉಪಕರಣಗಳನ್ನು ಬಳಸಲಾಗುತ್ತಿತ್ತು. ಆದರೆ ಈಗ ಬಹುತೇಕ ಎಲ್ಲ ಆಧುನಿಕ ಮೊಬೈಲ್ ದೂರವಾಣಿಗಳಲ್ಲೂ ಈ ಸಂಕೇತಗಳನ್ನು ಗುರುತಿಸುವ ತಂತ್ರಾಂಶ ಲಭ್ಯವಿರುವುದರಿಂದ ಪ್ರತ್ಯೇಕ ಉಪಕರಣದ ಆವಶ್ಯಕತೆ ಇಲ್ಲ.


ಮೊಬೈಲ್ ದೂರವಾಣಿ ಬಳಸಿ ಕ್ಯೂಆರ್ ಸಂಕೇತಗಳನ್ನು ಸ್ಕ್ಯಾನ್ ಮಾಡುವುದು ಬಹಳ ಸುಲಭ. ಮೊದಲಿಗೆ ನಿಮ್ಮ ದೂರವಾಣಿ ಉಪಕರಣದಲ್ಲಿ ಕ್ಯೂಆರ್ ಕೋಡ್ ರೀಡರ್ ತಂತ್ರಾಂಶವನ್ನು ಅಳವಡಿಸಿಕೊಳ್ಳಿ (ನಿಮ್ಮ ದೂರವಾಣಿಗೆ ಲಭ್ಯವಿರುವ ತಂತ್ರಾಂಶದ ಬಗೆಗೆ ತಿಳಿದುಕೊಳ್ಳಲು ಯಾವುದೇ ಸರ್ಚ್ ಇಂಜನ್ ಮೊರೆಹೋಗಬಹುದು). ಆ ತಂತ್ರಾಂಶವನ್ನು ಚಾಲೂ ಮಾಡಿ ನಿಮ್ಮ ದೂರವಾಣಿಯನ್ನು ಯಾವುದೇ ಕ್ಯೂಆರ್ ಕೋಡ್‌ನತ್ತ ತಿರುಗಿಸಿದರೆ ಸಾಕು, ಆ ತಂತ್ರಾಂಶ ಕ್ಯೂಆರ್ ಸಂಕೇತವನ್ನು ಅರ್ಥೈಸಿಕೊಂಡು ಅದರಲ್ಲಿ ಸೂಚಿಸಲಾಗಿರುವ ಕೆಲಸ ಮಾಡುತ್ತದೆ.


ಡೆನ್ಸೋ ವೇವ್ ಸಂಸ್ಥೆ ಕ್ಯೂಆರ್ ಸಂಕೇತಗಳ ಪೇಟೆಂಟ್ ಹಕ್ಕುಗಳನ್ನು ಹೊಂದಿದೆಯಾದರೂ ಅದು ಅವನ್ನು ಮುಕ್ತ ಬಳಕೆಗೆ ತೆರೆದಿಟ್ಟಿದೆ. ಹೀಗಾಗಿ ನಿಮ್ಮದೇ ಆದ ಕ್ಯೂಆರ್ ಸಂಕೇತಗಳ ರೂಪಿಸಿಕೊಳ್ಳುವುದು ಸುಲಭ ಮಾತ್ರವೇ ಅಲ್ಲ, ಉಚಿತವೂ ಹೌದು. ಕ್ಷಣಾರ್ಧದಲ್ಲೇ ಕ್ಯೂಆರ್ ಸಂಕೇತಗಳನ್ನು ರೂಪಿಸಿಕೊಡುವ ಅನೇಕ ಜಾಲತಾಣಗಳನ್ನು ಯಾವುದೇ ಸರ್ಚ್ ಇಂಜನ್ ನಿಮಗೆ ಹುಡುಕಿಕೊಡಬಲ್ಲದು.


ಏನೇನೆಲ್ಲ ಸಾಧ್ಯ
ಕಾರಿನ ಜಾಹೀರಾತಿನ ಜೊತೆಗಿರುವ ಕ್ಯೂಆರ್ ಕೋಡ್ ನಿಮ್ಮನ್ನು ಯೂಟ್ಯೂಬ್‌ನಲ್ಲಿರುವ ಆ ಕಾರಿನ ವೀಡಿಯೋದತ್ತ ಕೊಂಡೊಯ್ಯಬಹುದು; ಯಾವುದೋ ಜಾಲತಾಣದಲ್ಲಿರುವ ಸಂಕೇತ ಸ್ಕ್ಯಾನ್ ಮಾಡಿದರೆ ನಿಮ್ಮ ಮೊಬೈಲಿನಲ್ಲಿ ಆ ತಾಣದ ಮೊಬೈಲ್ ಸ್ನೇಹಿ ಆವೃತ್ತಿ ತೆರೆದುಕೊಳ್ಳಬಹುದು; ಇನ್ನಾವುದೋ ಸಂಕೇತ ನಿಮ್ಮ ಚಾಟಿಂಗ್ ಗೆಳೆಯರ ಪಟ್ಟಿಗೆ ಹೊಸ ಸ್ನೇಹಿತರನ್ನು ಸೇರಿಸಿಕೊಳ್ಳಲು ನೆರವಾಗಬಹುದು; ಹೊಸದಾಗಿ ಪರಿಚಯವಾದವರ ವಿಸಿಟಿಂಗ್ ಕಾರ್ಡ್ ಕೇಳಿದರೆ ಅವರು "ವಿಸಿಟಿಂಗ್ ಕಾರ್ಡ್ ಯಾಕೆ, ನನ್ನ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿಕೊಳ್ಳಿ; ನನ್ನ ಸಂಪರ್ಕದ ವಿವರಗಳೆಲ್ಲ ತಕ್ಷಣವೇ ನಿಮ್ಮ ಮೊಬೈಲಿಗೆ ಸೇರಿಕೊಳ್ಳುತ್ತವೆ" ಎಂದೂ ಹೇಳಬಹುದು. ಒಟ್ಟಿನಲ್ಲಿ ಕ್ಯುಆರ್ ಸಂಕೇತಗಳನ್ನು ಸ್ಕ್ಯಾನ್ ಮಾಡುವ ಮೂಲಕ ಅನೇಕ ಕೆಲಸಗಳನ್ನು ಪೂರೈಸಿಕೊಳ್ಳುವುದು ಸಾಧ್ಯ ಎನ್ನುವುದಂತೂ ಸತ್ಯ.


ರೀಡರ್ ತಂತ್ರಾಂಶದ ಸಹಾಯವಿಲ್ಲದೆ ಕ್ಯೂಆರ್ ಸಂಕೇತಗಳಲ್ಲಿರುವ ಮಾಹಿತಿ ಏನು ಎಂದು ಅರಿತುಕೊಳ್ಳುವುದು ಸಾಧ್ಯವಿಲ್ಲ. ಇದೇ ಅಂಶವನ್ನು ಆಧಾರವಾಗಿಟ್ಟುಕೊಂಡ ದುಷ್ಕರ್ಮಿಗಳು ಈ ಸಂಕೇತಗಳನ್ನು ಕೆಟ್ಟ ಉದ್ದೇಶಗಳಿಗಾಗಿಯೂ ಬಳಸಿಕೊಳ್ಳಬಹುದು ಎನ್ನುವುದೇ ವಿಪರ್ಯಾಸ.


ನಾವು ಸ್ಕ್ಯಾನ್ ಮಾಡುವ ಯಾವುದೋ ಸಂಕೇತ ನಮ್ಮನ್ನು ದುರುದ್ದೇಶಪೂರಿತ ಜಾಲತಾಣಗಳತ್ತ ಕೊಂಡೊಯ್ಯಬಹುದು, ಅಥವಾ ನಮ್ಮ ಮೊಬೈಲ್‌ನಲ್ಲಿರುವ ಮಾಹಿತಿಯನ್ನೆಲ್ಲ ಬೇರೆಯವರಿಗೆ ಕಳುಹಿಸಿಬಿಡಬಹುದಲ್ಲ! ಹೀಗಾಗಿಯೇ ನಂಬಲರ್ಹ ಎನಿಸದ ಯಾವುದೇ ಮೂಲದಿಂದ ದೊರಕುವ ಕ್ಯೂಆರ್ ಕೋಡ್‌ಗಳನ್ನು ಸ್ಕ್ಯಾನ್ ಮಾಡದಿರುವುದೇ ಒಳ್ಳೆಯದು ಎಂದು ತಜ್ಞರು ಹೇಳುತ್ತಾರೆ.
ಮಾಹಿತಿ: ಉದಯವಾಣಿಯಲ್ಲಿ ಪ್ರಕಟವಾದ ಲೇಖನ

Monday 4 June 2012

ಹೊಸ URL ನೊಂದಿಗೆ ನಿಮ್ಮ ಒಂಟಿಪ್ರೇಮಿ

ಆತ್ಮಿಯರೇ.......

              ನಿಮ್ಮೆಲ್ಲರ ನೆಚ್ಚಿನ ಒಂಟಿಪ್ರೇಮಿ  ಹೊಸ ಅವತಾರದಲ್ಲಿ ನಿಮ್ಮ ಮುಂದಿದೆ.

ಹೊಸ ಕವಿತೆಗಳು ಹಾಗೂ ಕಥೆಗಳನ್ನು ಹೊತ್ತು ಬಂದಿದೆ. ಒಮ್ಮ ಬೇಟಿನೀಡಿ

ಹೊಸ URL http://www.ontipremi.blogspot.com